Noticias Noticias da Mesa

A Mesa presentou en Valencia a situación do galego na xustiza

A Mesa pola Normalización Lingüística representou a Galiza na xornada Els drets lingüístics (Os dereitos lingüísticos) que se celebrou na Universidade de Valencia (UV) na que tamén participaron entidades e persoeiros do País Valencià, Catalunya e Euskadi.

A vicepresidenta da Mesa e avogada Elsa Quintas, impartiu unha conferencia baixo o título “A realidade nos xulgados das comunidades autónomas con linguas cooficiais”, na que falou sobre os reiterados incumprimentos que se dan na administración de xustiza sobre os dereitos lingüísticos da poboación.

Quintas denunciou a falta de cumprimento de varios puntos da Carta europea de linguas rexionais e minoritarias (CELRM) que ratificou o Estado español en 2001. Entre eles, detallou a falla de atención e uso da lingua galega por parte da Xustiza ou como non se fan accesíbeis, nas linguas rexionais ou minoritarias, os textos lexislativos nacionais máis importantes e os que afectan principalmente aos que empregan estas linguas.

Outro dos asuntos que trataron é a escasa concreción e adaptación normativa da lexislación actual coa CELRM. A vicepresidenta da Mesa aclarou que “mesmo existen textos legais que negan os dereitos que se recollen na Carta europea, como a Lei orgánica do poder xudicial ou a Lei de axuizamento civil”.

Por último, Quintas denunciou o nulo compromiso que existe por parte do Ministerio de Xustiza e da Xunta de Galiza co galego, vasco e catalán, xa que na actualidade carécese de aplicacións e programas informáticos que permitan realizar os trámites xudiciais nestas linguas, obrigando a facelo exclusivamente en castelán.

A Mesa mantén a súa actividade grazas ás socias e socios.
Colabora connosco asociándote

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis