Noticias da Mesa

O concello de Ourense denega permiso para recoller apoios á ILP a favor do galego nas relacións de consumo

A Mesa pregúntase o motivo polo que ao goberno local do PP  lle resulta nocivo o recoñecemento pleno do dereito a utilizar o galego sempre

A resposta en castelán pon de manifesto que o alcalde mantén a actitude de odio ao galego da súa etapa como conselleiro

A Mesa fará valer o seu dereito a recoller apoios a favor dunha ILP que cumpre con todos os requisitos fixados polo Parlamento e a Xunta electoral

Ourense, 7 de abril de 2017-. A Mesa pola Normalización Lingüística recibiu do Concello de Ourense a denegación da solicitude de colocación dun posto de recollida de sinaturas para apoiar a campaña da ILP polos dereitos lingüísticos no ámbito socioeconómico.

A resposta remitida polo Concello pon de manifesto o odio ao galego por parte do alcalde, Jesús Vázquez Abade, público e notorio desde a súa etapa de conselleiro de Educación da Xunta de Galiza. Ademais de denegar a solicitude o concello respostou en castelán, incumprindo a Lei de Normalización Lingüística de 1983, que no artigo 4 sinala que “o galego, como lingua propia de Galiza, é lingua oficial das institucións da Comunidade Autónoma, e da Administración local”. Casos coma este mostran a necesidade desta ILP e a inexistencia práctica da atención en galego por parte de entidades públicas e privadas.

A Mesa pregúntase que motivo pode ter o goberno do PP de Ourense para que lle resulte nocivo o recoñecemento do dereito a recibir información, documentación, contratos e atención en galego. “En que prexudica á cidadanía ourensá que teña á súa disposición unha mesa na rúa para se informar, e apoiar se quixer, unha ILP que só contempla o recoñecemento dun dereito fundamental? Que perigo para a vida normal da cidade observa para que se rexeite a presenza nas rúas dunha campaña a favor do galego?” preguntouse o presidente da Mesa, Marcos Maceira.

O coordinador da Mesa en Ourense, Manuel Carniceiro, lembrou ademais que son moitos e moitas as ourensás que traballan no sector da teleatención e que o recoñecemento do dereito á atención en galego neste sector é un bo antídoto contra a deslocalización e despedimentos que poñen en perigo os seus postos de traballo. A preocupación lóxica dos e das traballadoras deste sector só recibe desprezo e prohibición por parte do seu concello.

Segundo indicou Manuel Carniceiro, a cantidade de sinaturas recollidas nos últimos días na cidade de Ourense en apoio a esta ILP  xa supera o millar, mais “o concello pretende impedir que os apoios sigan crecendo”. “O grupo de traballo  dA Mesa pola Normalización Lingüística en Ourense seguirá recollendo con ou sen permiso do Concello”. Da entidade en defensa da lingua lembran que só se aterán ao dereito ao dereito a recoller apoios a favor dunha Iniciativa lexislativa Popular, admitida a trámite polo Parlamento de Galiza, que cumpre con todos os requisitos fixados pola Xunta electoral, e que se atén ao contemplado na Lei 7/2015 de Iniciativa Lexislativa Popular e participación cidadá.

A ILP naceu con motivo das múltiples queixas que chegan á aplicación A Liña do Galego, queixas que poñen de manifesto a vulnerabilidade dos dereitos lingüísticos e a nula garantía lexislativa de que se poda exercer ese dereito a vivir no noso idioma.

Esta ILP pretende impulsar un desenvolvemento legal que fixe o contido mínimo dos dereitos lingüísticos nas relacións comerciais, xa que a súa inexistencia, malia ser o galego unha lingua cooficial en Galiza, provoca continuamente situacións de vulnerabilidade, indefensión, denegación da atención e na prestación dos servizos.

 

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis