Abertos ao Galego

Que é o certificado ABERTOS AO GALEGO?

ABERTOS AO GALEGO é un certificado que se concede, en diferentes niveis, ás empresas, comercios, asociacións e entidades de toda índole que adopten e desenvolvan compromisos para a normalización do galego.

Cales son os requisitos para ostentar o certificado?

  1. Ter unha disposición favorábel ao uso do galego.
  2. Colaborar na análise anual da situación lingüística da entidade (para o cal A Mesa pon ao seu dispor unha “Ficha para analizar e planificar a situación lingüística”) e, segundo a mesma, proporse obxectivos anuais.
  3. Pagar a cota que corresponda para poder ostentar o certificado (46€ anuais máis 3€ por cada traballador ou traballadora que teña a empresa).

Quen se encarga do seguimento e avaliación?

A Mesa pola Normalización Lingüística, a maior asociación cultural de Galiza, con máis de vinte anos de historia ininterrompida, é a responsábel do seguimento, promoción e avaliación do certificado.

Cales son as vantaxes das empresas ou asociacións que contén co certificado abertos ao galego?

a. Figurarán no catálogo web, actualizado permanentemente na páxina www.amesa.gal/abertosaogalego.
b. Poderán participar nos actos comarcais e nacionais que se realizarán cada ano para as entidades que ostenten o certificado e que terán difusión mediática.
c. Poderán acceder a descontos publicitarios en medios de comunicación que colaboraren co proxecto.
d. Poderán utilizar o distintivo do certificado alí onde o consideraren oportuno (A Mesa entregará os distintivos correspondentes).
e. Conseguirán un impulso ao uso da lingua que nos une como galegos e como galegas, participando dunha ampla rede social.

Cales son as empresas que pertencen a abertos ao galego?

Nesta sección pódese consultar a listaxe actualizada.

Cales son as cotas para poder ostentar o certificado?

  • A base é de 46 €/ano, ao que se acrecentarán 3 €/ano por cada traballador ou traballadora.
  • As organizacións sen ánimo de lucro que non estean participadas pola Administración pública, que teñan entre 1 e 5 traballadores, non terán que pagar suplemento ningún por traballador/a; as que teñan máis de 5, terán que pagar 3 €/ano por cada traballador/a, a partir da/o sexta/o.
  • As empresas ou entidades con varias sedes ou locais contabilizaranse de xeito diferenciado segundo cada un dos enderezos, xa que nas guías tamén aparecerán separadamente.

Cal é o destino do diñeiro recadado nas cotas?

Todas as cotas recadadas irán destinadas integramente á xestión e ao desenvolvemento do propio proxecto do certificado (edición de folletos, catálogos, mantemento da páxina web, etc) e ao obxectivo de promover a extensión do uso do galego no ámbito socioeconómico.

Cales son os diferentes niveis do certificado?

A extensión da lingua galega a todos os ámbitos é un camiño que imos andando pouco a pouco. Por iso, o certificado estabelece catro graos. O Nivel UN é para quen está a dar os primeiros pasos; o Nivel DOUS para quen xa utiliza o galego cara ao exterior; o Nivel TRES para quen tamén o usa internamente, e o Nivel CATRO para aquelas entidades que ademais participan de forma especial en dinamizar o uso da lingua.

Nivel UN

  • Adoptaron e están a desenvolver medidas para a normalización do galego. Están aínda a dar os primeiros pasos.
  • No caso das empresas, estabelecerase como mínimo para este nivel o uso non deturpado da toponimia e o cumprimento da lexislación lingüística.
  • No caso das organizacións, o estabelecemento de medidas concretas para o uso do galego será suficiente para este nivel, malia que tales medidas aínda non se concretasen. A Mesa realizará un seguimento específico da aplicación das medidas nos prazos acordados coa entidade correspondente.

Nivel DOUS

  • Empresas e entidades que ofrecen toda a súa información exterior en galego.
  • No caso de facer uso tamén doutros idiomas, o galego será a lingua de opción positiva e que apareza salientada ou en primeiro lugar.

Nivel TRES

  • Ofrecen toda a información exterior en galego e, ademais, utilízano como lingua interna de traballo: nóminas, xestións administrativas, contabilidade etc.

Nivel CATRO

  • Ademais de realizaren un uso sistemático do galego tanto interna como externamente, solicitan a información e a documentación en galego a provedores e administracións.
  • Son entidades e empresas que dinamizan de xeito especial o uso e a extensión social do galego.

A onde me podo dirixir para conseguir máis información ou iniciar os trámites para obter o certificado?

Podes pórte en contacto coa Mesa pola Normalización Lingüística no correo electrónico abertosaogalego@amesa.gal ou no teléfono 981 56 38 85.

Abertos ao Galego Noticias da Mesa

A Mesa e Irmandade TV asinan un acordo para promocionar as empresas que empeguen o galego

O Presidente da Mesa pola Normalización Lingüística, Marcos Maceira, e o Director de Irmandade TV, Aurélio Lopez, asinaron hoxe un convenio de colaboración para a promoción e e divulgación da actividade das empresas que empreguen o galego, nomeadamente aquelas que participan no proxecto Abertos ao Galego, xestionado pola Mesa pola Normalización Lingüística.

Ler máis

Últimas noticias

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis