A Mesa pola Normalización Lingüística é a asociación do galego. O noso obxectivo é promover o galego en todos os ámbitos como a lingua que nos une.
Mantemos o proxecto Abertos ao Galego, dirixido a empresas e comercios que manteñen o galego como lingua normal de relación coas súas clientas e usuarios, e cuxo catálogo podes consultar aquí.
Publicamos informes e estudos sobre diferentes aspectos que afectan á nosa lingua. Recentemente publicamos o Informe sobre o cumprimento do PXNLG ou o Relatorio sobre a Carta Europea, xunto co Estudo sobre o galego na educación infantil. Todos eles foron utilizados para alertar sobre a situación do galego mesmo diante de organismos internacionais como o Consello de Europa, a UNESCO ou o Consello de Dereitos Humanos da ONU.
Realizamos accións para difundir a necesidade de que o galego exista a través do seu uso. Co vídeo 10 pasos para revitalizarmos o galego, conseguimos un forte impacto nas redes sociais, mais tamén con outros como En galego, festa rachada para reivindicar as nosas festas en galego, Parabéns para ti, o primeiro vídeo de difusión dunha música para os aniversarios das nosas crianzas, ou Queremos atención en galego, queremos traballo aquí
Editamos o primeiro Abecedario feito en galego e desde o galego, ou o libro das Aves dentro dunha colección didáctica que aspira a facer unha pequena achega aos materiais didácticos en galego para a educación infantil dos que por desgraza aínda non dispoñen o 67% dos centros de infantil de Galiza.
Promovemos campañas para a galeguización de servizos básicos como todos os relacionados coa atención ao público por parte de administracións e empresas onde non só non utilizan a nosa lingua senón que non atenden quen a utiliza.
Elaboramos Somos Galego un xornal bimestral en parcería con Sermos Galiza, onde se poden seguir as principais novas relacionadas coa lingua.
Impulsamos acordos entre a maior parte das forzas políticas galegas, como a Declaración de Unidade a prol da Normalización da lingua galega coa pretensión de que sexa un punto común para pór en práctica acción reais de recuperación e reposición do noso idioma.
Podemos contar algún pequeno mais importante suceso como que Larsa anunciase a corrección do topónimo deturpado que empregaban nos seus envases, que Carrefour permitise o galego como opción para as súas cartas de Nadal, que Yoigo se comprometese a estudar a posibilidade ofrecer atención e servizo en galego, ou que a Garda Civil se disculpase por atentar contra os dereitos lingüísticos dun cidadán.
Mais na Mesa non estamos satisfeitas nin satisfeitos. Non é suficiente. Aínda sabendo das dificultades que ten realizar unha tarefa que en grande parte debería asumir a administración galega, sabemos que é preciso moito máis esforzo pola nosa parte.
Precisamos máis apoio para mellorarmos e ampliarmos todo este traballo que cómpre facer máis participativo. Por iso te animamos a que difundas as nosas accións e actividades, a que nos fagas chegar as túas suxestións e opinións, e a que animes as túas amizades a facérense socias e socios.
