A Mesa pola Normalización Lingüística rexeita a decisión da dirección da Radio Galega de suprimir o programa O Diario Cultural. A Mesa considera que é unha decisión errada prescindir dun programa que dá soporte, difusión e promoción á cultura e lingua galegas. O peche do Diario Cultural, un recoñecido programa, é un ataque directo á lingua galega e diminúe deste xeito a xa cativa programación sobre a nosa cultura e a nosa literatura.
A Mesa mostra o seu apoio a toda a equipa do programa dirixida pola poeta e xornalista Ana Romaní. Sen plataformas culturais públicas como o Diario Cultural, perderiamos a xa minguada visibilidade social que a cultura galega ten nos medios de titularidade pública.
Esta decisión supón un paso máis no proceso de desmantelamento de todo o que ten que ver coa cultura e lingua propias de Galiza. Desde a Mesa pola Normalización Lingüística denunciamos tamén a desaparición de programas televisivos infantís en galego pola tarde na TVG 2. O estudo realizado pola Mesa en febreiro deste ano mostraba que a programación infantil da CRTVG era só do 4,6% pola semana baixando a 2,7% durante as fins de semana. A programación televisiva infantil actual aínda é máis reducida pois en febreiro había programación infantil de 17:05 a 20:55h e agora só de 19:40 a 20:30 o que supón un novo ataque á nosa lingua.
