Fai click na imaxe inferior para inscribirte 👇
Para a área de Igualdade, Lingua e Dereitos Civís da Deputación da Coruña e mais para o Observatorio de Dereitos Lingüísticos da Mesa pola Normalización Lingüística é fundamental defendermos activamente a presenza do galego en todos os ámbitos.
Unha das vías para o facer, é demandarmos pola vía xudicial os dereitos que nos negan a cotío institucións públicas e empresas malia figuraren no ordenamento xurídico. A negación diaria dos nosos dereitos obríganos a acudirmos aos tribunais para que se cumpran normas como a Lei de Contrato do Seguro, a Lei do Procedemento Administrativo, etc. Mais tamén para recorrer aquelas sancións impostas en aplicación da Lei Orgánica de Seguridade Cidadá por reivindicar o exercicio destes dereitos.
Neste sentido, cómpre dotármonos de novas ferramentas, explorarmos estratexias procesuais e contrastarmos as experiencias con compañeiros e compañeiras doutras nacións nas que, como na nosa, lles é negado o dereito a viviren na súa lingua. O respeito ao exercicio dos dereitos lingüísticos ha de ser sinónimo de democracia e de estado de dereito, partindo da premisa de que os dereitos lingüísticos fan parte dos dereitos humanos, e que ao seren negados e impedida a súa materialización ponse en perigo o sistema de valores sobre os que se sustenta un estado de dereito.
Para aprofundizar nesta cuestión, estamos a organizar unha xornada de debate arredor das posibilidades de litigación extratéxica como vía de avance para os dereitos lingüísticos, nas que gostaríamos de contar coa súa participación.
