A Mesa fai un chamamento a participarmos de forma activa nesta campaña para que o galego estea presente nos nosos teléfonos intelixentes.
A Mesa amosou o seu apoio á campaña #AndroidEnGalego e fixo un chamamento á súa base social a colaborarmos activamente nesta campaña para que o galego deixe de estar excluído dos nosos teléfonos móbiles.
Android é o sistema operativo que empregan máis do 90% dos teléfonos intelixentes que se venden en Galiza. A campaña #AndroidEnGalego, iniciada polo blog especializado Mallando no Android, quere visualizar a necesidade de que Google habilite o Galego como unha opción de idioma máis no sistema operativo base de Android, xa que actualmente queda en mans dos fabricantes a decisión de introducir ou non o galego como opción.
Amais de asinar o manifesto que se enviará a Google con todos os apoios recibidos, podemos colaborar deixando mensaxes no fío aberto no foro de soporte de Google ou axudando a difundir e visibilizar a campaña nas redes. As diferentes formas de apoiarmos esta campaña explícanse nesta ligazón: http://androidengalego.com/que-podo-facer-eu/
