Noticias da Mesa

A Mesa concentrouse polo galego nas Cancelas, mentres altos cargos do PP arrouparon o acto de inauguración, no cal se excluíu totalmente a lingua de Galiza

O secretario xeral de Política Lingüística apoiou o acto de inauguración nas Cancelas, o centro comercial que supón un paso atrás cualitativo e cuantitativo para o galego no comercio en Compostela

A comitiva da Mesa percorreu o centro comercial con consignas como “Non á exclusión, si ao galego” e interrompeu unha conexión en directo en que a TVG publicitaba ese centro comercial cunha entrevista en español ao seu xerente

A Mesa mantén a súa actividade grazas ás socias e socios.
Colabora connosco asociándote

Santiago de Compostela, 15 de novembro de 2012.- Un grupo de veciños e veciñas uníronse esta mañá, ao chamado da Mesa pola Normalización Lingüística, para protestaren pola exclusión do galego no centro comercial As Cancelas. Á mesma hora, o secretario xeral de Política Lingüística da Xunta e outros altos cargos do PP, saían do acto de inauguración, no cal se excluíu totalmente o idioma propio de Galiza. Ante a falta de diálogo por parte da xerencia das Cancelas, o presidente da Mesa anuncia que “se porán en andamento novas medidas de presión democrática en defensa do noso idioma”, pois “temos dereitos”.

 

O centro comercial As Cancelas, que exclúe ou minoriza o galego en comunicación, publicidade e sinalizacións, supón un retroceso para o “apoio histórico” que o comercio de Compostela deu á nosa lingua, mesmo tendo en conta centros comerciais como Área Central. Por iso, o grupo de persoas convocadas pola Mesa realizaron unha comitiva informativa por todo o centro, con consignas como “Non á exclusión, si ao galego”, “Se vendes en Galiza, vende en galego”, “Non á discriminación do noso idioma” ou “Non renunciamos á nosa lingua”.

 

A comitiva da Mesa tamén interrompeu a entrevista en directo que emitiu a TVG co xerente do centro comercial, Abraham Cano, quen se negou a responder en galego para a televisión autonómica. Cano xa lle trasladara á Mesa a súa intención de postergar o uso do galego, nun ton de prepotencia que a organización cidadá considera “incomprensíbel”.

 

Desde a asociación presidida por Carlos Callón lembran tamén que “todos os estudos de mercado constatan a boa disposición da sociedade galega cara ao uso do idioma propio no ámbito comercial e empresarial”. Apuntan ademais que esta valoración positiva se dá tanto nos falantes habituais de galego como nos falantes habituais de castelán, “que ven o galego como unha marca non só de proximidade, senón tamén de modernidade e novos tempos”. No caso concreto da sociedade de Santiago de Compostela, un estudo publicado polo Concello sinalaba que ao 83,9% dos veciños e veciñas lles parece “ben ou moi ben” que se use o galego na publicidade das empresas e produtos.

A Mesa mantén a súa actividade grazas ás socias e socios.
Colabora connosco asociándote

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis