Noticias Noticias da Mesa

A Mesa protesta en Ikea pola exclusión do galego do seu web e a invisibilización do catálogo impreso na nosa lingua

Activistas da Mesa pola Normalización Lingüística concentráronse esta mañá no Ikea de Marineda, na Coruña, onde despregaron unha faixa na que se podía ler Ikea faise o sueco co galego – Vi vill ha galiciska på Ikea (Queremos galego en Ikea). Tamén repartiron folletos animando a clientela a buscar os catálogos impresos en galego dentro da tenda, un obxectivo tan complexo que é preciso empregar un plano, que a entidade de defensa da lingua decidiu repartir para que as persoas interesadas puideran conseguilo.
Ante a escasa tiraxe de exemplares do catálogo en galego da multinacional sueca e máis a dificuldade para os atopar, o folleto da Mesa anima a clientela a pasarllo a outra persoas, “para que o use e continúe a distribuír a versión en galego”. E, finalmente, A Mesa recorda que aínda que o catálogo web de ikea está dispoñíbel en galego, a páxina web só dispón versión en castelán, inglés e catalán. “Ikea esqueceu o galego e non resposta os correos que enviamos para llo lembrar!”, denuncia a entidade, que anima a enviar un correo electrónico a so.arcolopd.es@ikea.com reclamando a web en galego ou a presentar unha queixa en atención ao cliente e enviar copia desta a linhadogalego@amesa.gal, para poder facer seguimento das queixas presentadas e aumentar a presión.
A Mesa pola Normalización Lingüística é unha plataforma independente, plural e apartidaria que ten como único obxectivo a promoción do uso do galego en todos os ámbitos da vida social propios de calquera idioma. O seu papel é o de emprender iniciativas que sensibilicen a poboación e que abran novas vías de uso do noso idioma en distintos ámbitos, así como denunciar todo tipo de agresións e discriminacións que poida sufrir a lingua galega e asegurar que se respecte o seu uso individual e colectivo. Calquera persoa sensíbel coa causa do idioma galego pode facer parte da Mesa, que coas súas 4000 socias e socios é a maior asociación cultural de Galiza. Todas aquelas persoas que coñezan ou sofran casos de discriminación polo uso do galego poden tramitar a súa denuncia a través da Liña do galego.

A Mesa mantén a súa actividade grazas ás socias e socios.
Colabora connosco asociándote

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis