Noticias Noticias da Mesa

A Xunta di apostar polo galego no ámbito económico mais vota en contra de aumentar dereitos lingüísticos

Marcos Maceira: “a SXPL dedícase ao markentig no canto de actuar para normalizar o galego”

A Mesa pola Normalización Lingüística critica o cinismo da Xunta e nomeadamente da Secretaría Xeral de Política Lingüística, por diciren que apostan pola promoción do galego no ámbito económico e empresarial cando hai uns meses votaban en contra dunha iniciativa lexislativa popular (ILP) da Mesa para garantir os dereitos lingüísticos neste ámbito.

Para o presidente da Mesa, Marcos Maceira, “é vergoñento escoitar o secretario xeral de política lingüística dicir que a Xunta traballa na visibilización da lingua galega nun ámbito no que vetaron a posibilidade de aumentar dereitos lingüísticos para a poboación. O único que fan é vender fume”.

Maceira detallou como en decembro de 2017, o Partido Popular vetaba no Parlamento Galego unha iniciativa asinada por máis de 28.000 persoas e que contaba co apoio de institucións e entidades comerciais, empresariais e sociais. A ILP promovida pola Mesa, procuraba garantir por lei os dereitos lingüísticos da poboación no ámbito socioeconómico e tamén favorecer a creación de postos de traballo no país en sectores como os da teleatención.

A Mesa denuncia o abandono de funcións por parte da Xunta e da SXPL, “o único que saben facer é vender plans de dinamización da lingua galega pantasma só para crear titulares”, en referencia aos anunciados pero non executados plans de dinamización do galego no tecido económico e o plan de dinamización do galego na mocidade.

Maceira lembrou que mentres a Xunta se dedica a facer que fai, a Liña do Galego, servizo gratuíto que ofrece a Mesa para rexistrar parabéns e queixas sobre o uso do idioma, recibe centos de queixas por vulneración de dereitos lingüísticos básicos que demostran como é necesario aprobar leis que favoreza o uso da lingua propia de Galiza.

Por último, desde a Mes animan aos consumidores e consumidoras que non renuncien a exercer os seus dereitos, tamén os lingüísticos, pois con pequenas accións como pedir unha factura en galego ou reclamar atención na lingua propia podemos conseguir avances para o galego e tamén contribuír ao mantemento de postos de traballo no país.

A Mesa mantén a súa actividade grazas ás socias e socios.
Colabora connosco asociándote

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis