Impartirao Xabier Díaz coa colaboración de Guillerme Fernández
O Concello de Carballo, a través do seu Servizo de Normalización Lingüística, organiza un ano máis un obradoiro de nanas dirixido a nais e pais, presentes ou futur@s, así como a outr@s familiares, formador@s ou persoas interesadas que queiran aprender ou practicar o aproveitamento do poder emocional das nanas e cantos de berce para arrolar os seus bebés.
O obradoiro será impartido polo músico bergantiñán Xabier Díaz, cantante dos grupos Berrogüetto e aCadaCanto e que, entre outros proxectos, publicou hai dous anos o exitoso disco “Arrolos de salitre”, un álbum que contén precisamente 11 cantos de berce en galego. Este disco foi editado xunto co músico Guillerme Fernández, tamén músico de Berrogüetto e aCadaCanto, e que tamén participará neste obradoiro.
O obradoiro desenvolverase o mércores 20 e o mércores 27 de novembro, en horario de 17.00 a 19.00 horas, no Pazo da Cultura de Carballo. A inscrición é gratuíta e pode facerse no Servizo de Normalización Lingüística (no Pazo da Cultura) ou no teléfono 981 704 304, en días laborábeis en horario de mañá.