Ferrol Noticias da Mesa

FERROL.- A Mesa alerta do retroceso do galego na FIMO

Malia o apoio económico de administracións galegas o noso idioma propiofoi desprazado polo castelán

“As administracións sosteñen a quen despreza o noso idioma”, sinala Carlos Outeiro, responsábel ferrolán da Mesa

A Mesa mantén a súa actividade grazas ás socias e socios.
Colabora connosco asociándote

A Mesa pola Normalización Lingüística da zona de Ferrol, a través do seu responsábel, Carlos Outeiro, vén de presentar unha queixa ante o Instituto Galego de Consumo da Consellaría de Industria por un novo retroceso na presenza pública da lingua galega.

Neste ano 2011 a Feira Internacional de Mostras do Noroeste (FIMO) realiza a súa publicidade en castelán excluíndo o galego. Insercións en xornais, cartelaría, sinaléctica varia, información persoal, … exclúe o galego malia a FIMO recibir apoio económico de diversas institucións galegas: Xunta de Galiza, Deputación da Coruña, Concello de Ferrol ou Cámara de Comercio.

Desde o ano 1994 en que este organismo adopta o actual nome FIMO (repárese en que fai referencia a Mostras non Muestras) a utilización do galego na súa publicidade foi normal até este ano, no que atopamos que é desprazado polo castelán, o que constitúe unha outra lesión nos dereitos lingüísticos da nosa sociedade.

Segundo explica Carlos Outeiro, utilizar o galego significa “nada máis e nada menos que o cumprimento da normativa legal municipal –Ordenanza de Normalización Lingüística- ou por exemplo do Plan Xeral de Normalización da Lingua Galega, aprobado por unanimidade no Parlamento Galego no ano 2004”. No caso que nos ocupa, sinala, “as administracións sosteñen economicamente a quen despreza o noso idioma”.

A Mesa demandou da organización de FIMO coñecer as medidas a impulsaren para evitar esta situación en anos vindeiros. Aliás, trasladará a queixa ao Concello de Ferrol e á Deputación da Coruña pola utilización dos cartos públicos en iniciativas e actividades que exclúen o galego.

A Mesa mantén a súa actividade grazas ás socias e socios.
Colabora connosco asociándote

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis