Noticias da Mesa

O Valedor do Pobo reúnese mañá co presidente da Mesa pola Normalización Lingüística

José Julio Fernández solicitou unha reunión con Carlos Callón para valorar a situación do idioma galego.

A Mesa alerta da “cada vez máis acentuada vulneración do dereito a vivir en galego”.

A Mesa mantén a súa actividade grazas ás socias e socios.
Colabora connosco asociándote

Mañá ás 12.30 da mañá manterán unha entrevista na sede do Valedor do Pobo o actual Alto Comisionado, José Julio Fernández, e o presidente da Mesa pola Normalización Lingüística, Carlos Callón. O encontro prodúcese por un convite realizado polo Valedor ao representante da maior asociación cultural de Galiza para coñecer as súas opinións sobre a situación do idioma galego.

 

A Mesa pola Normalización Lingüística, que mantivo “profundas desavinzas” coa actitude cara ao galego do anterior Valedor do Pobo, achegará “tanto datos propios como de organismos oficiais como o Consello de Europa” sobre a “preocupante e cada vez máis acentuada vulneración dos dereitos lingüísticos das galegas e dos galegos”.

 

Carlos Callón exporá, así, que “o 96% das escolas infantís das nosas cidades non impartiron nada en galego no curso escolar que agora está a finalizar”, o cal supón “darlle ao galego un tratamento de lingua non oficial”, ademais de “vulnerar mesmo tratados internacionais sobre dereitos lingüísticos, como a Carta Europea das Linguas”.

 

A ese respecto, o presidente da Mesa tratará co Valedor do Pobo o último relatorio emitido polo Consello de Europa sobre a situación lingüística en Galiza “que demostra con contundencia que a Xunta e o Goberno español están a pór paus nas rodas á posibilidade da revitalización do galego” e que “hoxe é máis difícil vivir en galego que hai cinco ou seis anos”.

 

Os outros dous temas que levará Carlos Callón á reunión son a “nula dilixencia da Xunta en responder ás queixas sobre dereitos lingüísticos que lles remitimos desde A Mesa, que reciben os nosos exemplos de vulneración da lexislación que protexe o galego como quen ouve chover” e o “problema da ausencia de sinalizacións públicas no noso idioma en autoestradas, estradas, comisarías da Policía Nacional, cuarteis da Garda Civil, hospitais, delegacións da Axencia Tributaria, etc”.

 

A Mesa mantén a súa actividade grazas ás socias e socios.
Colabora connosco asociándote

Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis