A xornada Medrar en galego, organizada pola Mesa pola Normalización Lingüística, o Concello de Allariz, a Deputación de Ourense, o Espazo Ben Común e a Confederación de ANPAS galegas, contou a pasada fin de semana cun grande éxito de público. As reflexións compartidas polas persoas participantes arredor do uso do galego e as etapas psicoevolutivas e das estratexias para enfrontar o problema da crianza na lingua propia no contexto actual serán compiladas nunha publicación coa que se espera contribuír ao debate social.
Tamén se decidiu que o proxecto Familias polo galego tome a remuda do labor realizado ao longo da xornada, para o que se convida a todas as familias que queiran traballar activamente pola crianza na nosa lingua contacten coa Mesa pola Normalización Lingüística a través do correo electrónico amesa@amesa.gal ou de calquera dos seus perfís nas redes sociais.
