“Acumulamos décadas de incumprimento sistemático das cativas normas favorábeis ao uso social e público do galego”

Queremos Galego publica na súa web unha carta aberta da profesora da UdC e activista pola lingua Pilar García Negro a Ricardo Carvalho Calero, autor homenaxeado no Día das Letras deste 2020 Compostela, 4 de maio de 2020.- A plataforma cidadá Queremos Galego publicou esta mañá na súa páxina web o manifesto que escribiu a […]

Queremos Galego publica na súa web unha carta aberta da profesora da UdC e activista pola lingua Pilar García Negro a Ricardo Carvalho Calero, autor homenaxeado no Día das Letras deste 2020

Compostela, 4 de maio de 2020.- A plataforma cidadá Queremos Galego publicou esta mañá na súa páxina web o manifesto que escribiu a profesora da Universidade da Coruña e activista pola lingua María do Pilar García Negro para este 17 de maio. García Negro diríxese a Ricardo Carvalho Calero, autor homenexado no Día das Letras Galegas de 2020, nunha carta aberta na que recorda que “os seus estudos, os seus artigos, analisaron perfeitamente a impostura radical da lexislación constitucional e estatutaria verbo da normalización necesaria da lingua de noso” e denuncia que “aínda por riba desta limitación, acumulamos anos e anos  –décadas– de incumprimento sistemático das cativas normas favorábeis ao uso social e público do galego”.
A discípula de Carvalho Calero advirte na súa misiva que “a última década resulta particularmente escandalosa no maltrato que as autoridades autonómicas usan para co galego”, explicando que “se procedeu directamente a lexislar na súa contra, a confinalo aínda máis do que xa estaba, a fomentar descaradamente a españolización por todas as vías: ensino, meios de comunicación, sociedades públicas…” “Non se trata só dun desprezo pasivo”, dille García Negro a Carvalho Calero e, a través del, ao conxunto da sociedade galega, “senón da exclusión organizada con toda a prepotencia e, ao tempo, con todo o servilismo á indiscutida lingua oficial do Estado”.

A profesora e activista recorda a intervención de Carvalho Calero no encontro sobre os problemas e as necesidades da nosa lingua de que derivou na constitución da Mesa pola Normalización, o mes de abril de 1986 e comunícalle ao mestre que “as nosas demandas, as nosas reclamacións, a nosa loita pro-galego foi ratificada e corroborada por non poucos organismos internacionais, desde a UNESCO até a propria ONU, pasando por diferentes instancias europeas”. E remata recuperando as palabras de Carvalho: “Hai que ganhar ou recuperar para o uso normal do galego aqueles sectores sociais que hoje tenhem como língua normal o castellano“. Esta é unha tarefa á que queremos convocar, co amor, o respeito e o afán que a causa da lingua merece, advrite García Negro, a toda a povoación galega e, nomeadamente, todos os mozos e mozas en cuxa man está a digna perpetuación viva do noso idioma. “Somos galegas e galegos. A mellor forma de que esta condición se exteriorice, de que non se disimule, de que se admita coa necesaria naturalidade e orgullo, é a práctica da nosa lingua. Neste Día das Letras Galegas, a vostede dedicado, manifestámoslle o noso afecto, a nosa memoria agradecida, a débeda con vostede contraída, débeda e exemplo que queremos converter en actos positivos para a lingua que vostede tanto e tan ben tratou e arrequeceu”.

Queremos Galego, composta por máis de 600 entidades, anima a sociedade galega a manter as mobilizacións do 17 de maio, pendurando de xanelas e varandas a bandeira galega e cartaces que reivindiquen a nosa lingua co lema Precisamos do galego: xustiza, igualdade e cohesión como os que a plataforma ofrecerá desde a súa web, listos para descargar e imprimir en difetentes formatos. “A lingua galega non ficará confinada este 17 de maio”, asegura Marcos Maceira, voceiro de Queremos Galego (audio dispoñíbel aquí), que chama tamén ás persoas usuarias das redes sociais a partillar ao longo de todo o día vídeos e fotografías de anteriores convocatorias baixo as etiquetas #PrecisamosDoGalego #QueremosGalego e #17demaio.

As mobilizacións do 17 de maio mantéñense dende as casas

Queremos Galego anima a sociedade a celebrar o Día das letras desde as casas, reivindicando a nosa lingua en xanelas e varandas e nas redes sociais baixo o lema Precisamos do galego: xustiza, igualdade e cohesión A plataforma cidadá Queremos Galego, composta por máis de 600 entidades, anima a sociedade galega a manter as mobilizacións […]

Queremos Galego anima a sociedade a celebrar o Día das letras desde as casas, reivindicando a nosa lingua en xanelas e varandas e nas redes sociais baixo o lema Precisamos do galego: xustiza, igualdade e cohesión

A plataforma cidadá Queremos Galego, composta por máis de 600 entidades, anima a sociedade galega a manter as mobilizacións do 17 de maio, pendurando de xanelas e varandas a bandeira galega e cartaces que reivindiquen a nosa lingua co lema Precisamos do galego: xustiza, igualdade e cohesión como os que a plataforma ofrecerá desde a súa web, listos para descargar e imprimir en difetentes formatos. “A lingua galega non ficará confinada este 17 de maio”, asegura Marcos Maceira, presidente da Mesa e voceiro de Queremos Galego (audio dispoñíbel aquí), que chama tamén ás persoas usuarias das redes sociais a partillar ao longo de todo o día vídeos e fotografías de anteriores convocatorias baixo as etiquetas #PrecisamosDoGalego #QueremosGalego e #17demaio.

A palataforma cidadá pretende, desta maneira, manter o 17 de maio a reivindicación de avances reais para o galego, aproveitando a data para recordar a obriga que teñen todos os poderes públicos de cumprir co sinalado tanto polo Comité de Ministros do Consello de Europa como polo relator especial da ONU para as minorías nacionais. Queremos Galego recorda que ambos os dous organismos internacionais advertiron expesamente da necesidade de garantir que a cidadanía galega poida empregar a súa lingua en ámbitos como a xustiza, a administración pública e o ensino. O Comité de Ministros do Consello de Europa instou a “eliminar todos os obstáculos para o ensino en galego en Galiza”, o que implica a derrogación “inmediata” do decreto de plurlingüísmo”.

O mesmo Consello de Europa indicou recentemente a obriga dos poderes públicos de daren información sobre a COVD19 nas linguas propias. A este respecto, Queremos Galego sinala que non podemos permitir que o máximo desprezo á nosa lingua nestes tempos veña do presidente da Xunta, utilizando como lingua principal o castelán nas súas comparecencias públicas. Con esta actitude, o presidente da Xunta mostra desprezo polo seu cargo, polas súas obrigas respecto á lingua e ás galegas e galegos. “Desprezar o galego, excluíndoo de mensaxes de tanta relevancia”, aseguran, “non só non contribúe á loita contra a epidemia, senón que incide en prexuízos ideolóxicos sobre a nosa lingua e sobre Galiza”. Un desprezo pola lingua de Galiza que chega mesmo á exclusión do galego na atención do teléfono do Coronavirus.

Queremos Galego lembrará, tamén, o 17 de maio a figura de Ricardo Carvalho Calero, autor homenexado no Día das letras galegas de 2020, cunha traxectoria ligada á defensa da lingua galega en todos os seus aspectos, a través dun manifesto que difundirá a través das redes sociais e que será elaborado pola discípula de Carvalho Calero, a profesora da Universdade da Coruña e activista pola lingua María do Pilar García Negro.

Pedímoslle á Real Academia Galega que o 17 de maio de 2021 sexa dedicado de novo a Carvalho Calero

Recordámoslle á entidade responsábel da elección do adicatario desta data que a crise provocada pola Covid-19 interrompeu grande parte dos actos previstos para a difusión, valorización e coñecemento público da figura e da obra do autor e que as medidas de distanciamento social fan que sexa imposíbel polo momento propor alternativas Compostela, 13 de abril […]

Recordámoslle á entidade responsábel da elección do adicatario desta data que a crise provocada pola Covid-19 interrompeu grande parte dos actos previstos para a difusión, valorización e coñecemento público da figura e da obra do autor e que as medidas de distanciamento social fan que sexa imposíbel polo momento propor alternativas

Compostela, 13 de abril de 2020.- A Mesa pola Normalización Lingüística pediulle esta mañá formalmente á Real Academia Galega que “alongue” ao 2021 a dedicación do Día das Letras galegas a Ricardo Carvalho Calero. A entidade de defensa da lingua recórdalle á RAG, entidade responsábel da elección do adicatario desta data, que a crise provocada pola Covid-19 interrompeu grande parte dos actos previstos para a difusión, valorización e coñecemento público da figura e da obra do autor galego, sen que sexa posíbel polo momento propor alternativas.

Estamos a vivir unha crise sanitaria de graves consecuencias en todos os planos da vida social, económica e cultural, coa paralisación obrigada de toda actividade para evitar a expansión da epidemia. O curso académico non se retomará con normalidade, librarías e bibliotecas permanecen fechadas, a actividade do asociacionismo cultural está paralisada e isto afecta de igual maneira ao amplo abano de actividades, homenaxes e recoñecementos por todo o país ao autor homenaxeada no Día das Letras Galegas de 2020. “Estamos diante unha situación excepcional que obriga a decisións excepcionais”, afirma o presidente da Mesa, Marcos Maceira, na carta remitida esta mañá a Vítor Freixanes, presidente da Real Academia.

A adicatoria do Día das Letras Galegas a Carvalho Calero foi motivo de celebración por grande parte das entidades sociais e culturais de Galiza polo merecemento do autor e por ser reclamado por moitas destas entidades, entre elas a Mesa pola Normalización Lingüística, desde había moito tempo. Todo este tecido social que pula día a día polos avances na normalización da nosa lingua coincide na relevancia da personalidade e ampla obra de Carvalho Calero para o obxectivo común da dignificación e plena reposición do galego en todos os ámbitos. A Real Academia Galega anunciou recentemente o adiamento dos actos oficiais do Día das Letras Galegas para o 31 de outubro, no que ademais se celebra o 110 aniversario do nacemento do autor homenaxeado en 2020, Ricardo Carvalho Calero.

A Xunta exclúe o galego da atención telefónica polo coronavirus

A Mesa presentará unha queixa tanto ás institución sanitarias galegas como á Valedora do Pobo pola indefensión á que somete o goberno galego á cidadanía ao eliminar a nosa lingua da xestión da crise provocada pola pandemia Compostela, 27 de marzo de 2020.- A Mesa pola Normalización Lingüística denuncia que a Xunta exclúe o galego […]

A Mesa presentará unha queixa tanto ás institución sanitarias galegas como á Valedora do Pobo pola indefensión á que somete o goberno galego á cidadanía ao eliminar a nosa lingua da xestión da crise provocada pola pandemia

Compostela, 27 de marzo de 2020.- A Mesa pola Normalización Lingüística denuncia que a Xunta exclúe o galego da atención telefónica polo Coronavirus, ao non ofrecer un argumentario na nosa lingua ao persoal que atende as chamadas relacionadas coa pandemia. As e os teleoperadores que resolven as consultas da cidadanía sobre a enfermidade no teléfono habilitado polo goberno galego, o 900 400 116, teñen obriga de cinguirse a unha serie de puntos informativos que só teñen dispoñíbeis en castelán.
As persoas galegofalantes que chamen a este número para cotexar se a súa sintomatoloxía é compatible coa enfermidade non serán, polo tanto, atendidas na súa lingua, o que aumenta a posibilidade dunha comunicación infrutuosa e pode poñer en risco a asistencia sanitaria. Unha vez máis, é a cidadanía galega a que ten que facer o esforzo de abandonar a súa lingua para poder entenderse co sistema público de saúde.
A Mesa denuncia que “a atención que se nos presta aos galegos e ás galegas no noso idioma neste momento de crise é practicamente inexistente”, dando lugar a “unha grave limitación ao noso dereito fundamental a expresármonos no noso idioma coa administración autonómica”. Esta situación engádese ao desprezo pola nosa lingua que o presidente e os cargos políticos do sistema galego de saúde están a amosar nas comparecencias súas públicas e na app do Sergas, que ofrece a información sobre o Coronavirus en castelán aínda que estea habilitada a opción en galego.

A Mesa enviaralle esta queixa tanto ás institución sanitarias galegas como á Valedora do Pobo.

Unha petición en liña de Queremos Galego rexistra máis de 2500 adhesións en menos de 24h
A petición en liña da plataforma Queremos Galego ao presiente da Xunta para que “exerza de presidente” e tome todas as medidas necesarias para preservar a integridade e a saúde da cidadanía galega, ofrecéndolle información clara e precisa, na súa lingua, sobre a epidemia do Coronavirus acadou máis de 2500 adhesións en menos de 24h.

Queremos Galego pídelle a Feixoó que “exerza de presidente” e lle ofreza á cidadanía galega información na súa lingua sobre a epidemia do Coronavirus

A plataforma cidadá pola defensa da nosa lingua, composta por máis de 600 entidades, publica na súa páxina web unha petición aberta ao presidente da Xunta na que lle recorda que “desprezar o galego, excluíndoo de mensaxes de tanta relevancia, non só non contribúe á loita contra a epidemia, senón que incide en prexuízos ideolóxicos […]

A plataforma cidadá pola defensa da nosa lingua, composta por máis de 600 entidades, publica na súa páxina web unha petición aberta ao presidente da Xunta na que lle recorda que “desprezar o galego, excluíndoo de mensaxes de tanta relevancia, non só non contribúe á loita contra a epidemia, senón que incide en prexuízos ideolóxicos sobre a nosa lingua e sobre Galiza”

ASINA AQUÍ A PETICIÓN

Continuar lendo…

Homenaxe a Ricardo Carvalho Calero no 30 aniversario do seu pasamento

O 25 de Marzo, de hai trinta anos, falecía en Santiago de Compostela Ricardo Carvalho Calero. Neste seu cabodano, a Mesa pola Normalización Lingüística e mais a Federación de Asociacións Culturais Galiza Cultura tiñamos pensado lembralo cunha oferenda floral na súa tumba, no cemiterio de Boisaca, e homenaxear a súa persoa e obra cunha actuación […]

O 25 de Marzo, de hai trinta anos, falecía en Santiago de Compostela Ricardo Carvalho Calero. Neste seu cabodano, a Mesa pola Normalización Lingüística e mais a Federación de Asociacións Culturais Galiza Cultura tiñamos pensado lembralo cunha oferenda floral na súa tumba, no cemiterio de Boisaca, e homenaxear a súa persoa e obra cunha actuación da coral compostelana Solfa, perante o que fora o seu domicilio en Santiago, na Carreira do Conde, moi perto de onde se instalou o busto que o recorda, en 2010, no centenario do seu nacemento. Por todas as circunstancias que estamos a viver, faise forzoso adiar estes actos, que esperamos, porén, celebrar noutra data do ano presente.

En lembranza de Don Ricardo e desta data, xuntamos  ligazón ao artigo que publica en Nós diario a presidenta da Federación de asociación culturais Galiza Cultura, María do Pilar García Negro:

https://www.nosdiario.gal/opinion/maria-pilar-garcia-negro/trinta-anos/20200323132718093613.html

Información para socias e socios. Adiada a Asemblea Xeral

Información para socias e socios O artigo 15 do estatutos da Mesa pola Normalización Lingüística estabelecen que se debe celebrar a Asemblea Xeral da Mesa unha vez ao ano e entre os meses de xaneiro e abril incluídos. Neste sentido, a data prevista pola Comisión Permanente da Mesa para a convocatoria da Asemblea Xeral era […]

Información para socias e socios

O artigo 15 do estatutos da Mesa pola Normalización Lingüística estabelecen que se debe celebrar a Asemblea Xeral da Mesa unha vez ao ano e entre os meses de xaneiro e abril incluídos. Neste sentido, a data prevista pola Comisión Permanente da Mesa para a convocatoria da Asemblea Xeral era o sábado 25 de abril

Porén, a situación de estado de alerta fixada polo Real Decreto 463/2020 polo que se declara o estado de alerta, e a posibilidade de prorrogarse máis tempo, impédenos convocala con garantías suficientes de se poder celebrar nestas datas. Por este motivo, a Comisión permanente decidiu por unanimidade esperar a que a situación permita manter a Asemblea Xeral cunhas garantías mínimas de participación de todas as socias e socios.

Ademais informámosche de que perante a grave situación económica derivada da emerxencia sanitaria que con certeza afectará a grande parte das socias e socios, a Comisión Permanente decidiu tamén pospor o pagamento das cuotas de abril a xullo.

De calquera xeito, agradeceríamos a aquelas persoas que se encontraren en dificuldades para este pagamento que que nolo comuniquen á maior brevidade posíbel para evitar o envío da cuota e non termos devolucións imprevistas.

Como xa foi comunicado, a Mesa manterá a súa actividade fóra da súa sede de Santiago de Compostela, permanecendo activa a administración e o servizo da Liña do Galego. Non se realizarán envíos postais nen aquelas actividades que precisen da presenza física do persoal na sede da Mesa.

Obrigados pola comprensión moita forza e ánimo para superarmos esta situación.

A Mesa pídelle a Feixoo que respecte o dereito das e dos galegos a recibir información na súa lingua na crise do coronavirus

A asociación pola defensa da lingua lémbralle ao presidente da Xunta que usar o galego é unha das súas obrigas e que, en primeiro lugar, se debe ás galegas e galegos

A asociación pola defensa da lingua lémbralle ao presidente da Xunta que usar o galego é unha das súas obrigas e que, en primeiro lugar, se debe ás galegas e galegos

Continuar lendo…

A MESA POLA NORMALIZACIÓN LINGÜÍSTICA SUSPENDE A ACTIVIDADE NA SÚA SEDE

Seguindo as indicacións das autoridades sanitarias galegas para a prevención do contaxio do COVID-19, A Mesa pola Normalización Lingüística suspende temporalmente a actividade na súa sede en Santiago de Compostela. A suspensión, que comeza hoxe mesmo e rematará cando o aconsellen as autoridades, afectará tanto á atención presencial como ao envío de publicacións e materiais. […]

Seguindo as indicacións das autoridades sanitarias galegas para a prevención do contaxio do COVID-19, A Mesa pola Normalización Lingüística suspende temporalmente a actividade na súa sede en Santiago de Compostela. A suspensión, que comeza hoxe mesmo e rematará cando o aconsellen as autoridades, afectará tanto á atención presencial como ao envío de publicacións e materiais.

Manteremos abertas as canles de comunicación non presencial, a través do enderezo electrónico amesa@amesa.gal e dos teléfonos 981563885 e 604028483, así como da web e das redes sociais. Tamén continúa en funcionamento o servizo A Liña do Galego, a través das App para IOs e Android e do enderezo linhadogalego@amesa.gal. As incidencias urxentes tramitaranse de inmediato, mais o resto só se documentarán para se tramitaren cando se restabelecer a normalidade.

A Mesa pola Normalización Lingüística oferece a súa colaboración ás autoridades sanitarias galegas e lembra que a liña específica de atención ao coronavirus en Galiza é o número 900400116.

A Mesa tramitou en 2019 318 queixas da cidadanía galega por discriminacións e vulneracións de dereitos lingüísticos

Case a metade das reclamacións (o 45,28%) refírense á administración pública, destacando entre elas as dirixidas ao Servizo Galego de Saúde (27,88%) e á propia Xunta de Galiza (31,73%) Marcos Maceira recordou que tanto o Consello de Europa como a ONU -a través do informe do seu relator especial para os Dereitos Humanos- recollen expresamente […]

Case a metade das reclamacións (o 45,28%) refírense á administración pública, destacando entre elas as dirixidas ao Servizo Galego de Saúde (27,88%) e á propia Xunta de Galiza (31,73%)

Marcos Maceira recordou que tanto o Consello de Europa como a ONU -a través do informe do seu relator especial para os Dereitos Humanos- recollen expresamente a vulneración dos dereitos lingüísticos en Galiza

Compostela, 12 de marzo de 2020.- Marcos Maceira, presidente da Mesa pola Normalización Lingüística; Elsa Quintas, directora do Observatorio de Dereitos Lingüísticos e vicepresidenta da Mesa; e María Muíño, deputada de Lingua da Deputación da Coruña, presentaron esta mañá en Compostela o Informe Anual da Liña do Galego correspondente a 2019. Segundo recolle dito informe, ao longo do pasado ano, a entidade de defensa da lingua tramitou 318 expedientes de queixas (15 máis que no exercicio anterior), 27 consultas e 197 parabéns (139 máis que no 2018) a través de chamadas, correos e mensaxes na App da Liña do Galego.

“As 318 queixas recibidas (15 máis que no exercicio anterior) son unha mínima parte das discriminacións e vulneracións de dereitos que acontecen todos os días e que en moitos dos ámbitos sinalados son sistemáticas”, recordou Elsa Quintas. Quintas salientou, tamén, que case a metade das queixas (un 45,28%) refírense á administración pública, tanto estatal como autonómica e local. O 62% destas queixas recaen na administración autonómica, cun 27,88% referidas ao Servizo Galego de Saúde e o resto, á propia Xunta e lamentou que “quen máis debería facer cumprir a lexislación que protexe e respecta o galego é, precisamente, quen máis a incumpre e vulnera”. O resto destas queixas corresponden ao Estado (24%) e á administración local (14%). Dentro desta última, destacan as queixas presentadas ao Concello de Vigo, cun 5,77% das queixas totais dirixidas ás administracións públicas.

Quintas salientou, tamén, o aumento dun 10% nas queixas da cidadanía perante a vulneración dos seus dereitos lingüísticos polas empresas que prestan servizos públicos e relacionou este aumento tanto coa privatización dos servizos públicos como co “grao de conciencia que ten a sociedade galega a respecto do seu dereito a recibir os servizos públicos na nosa lingua, sexa pública ou privada a entidade que os preste”. A maioría das queixas enviadas polas usuarias e usuarios da Liña do Galego durante o ano 2019 refírense á discriminación e exclusión do galego (35,53%, fronte ao 30% rexistrado no 2018) e á deturpación toponímica (35,22%), denunciando o incumprimento sistemático da lexislación vixente en materia de normalización lingüística.”O galego é a lingua das galegas e galegos, temos dereitos e queremos vivir nela”, recordou Quintas, “e, por iso, convén reclamar”.

A responsábel do Observatorio de Dereitos Lingüísticos recordou que o traballo que desenvolve a Liña do Galego de tratamento, asesoramento, difusión e atención das queixas ten conseguido que se emendaran algúns comportamentos e políticas lingüísticas de empresas e administracións públicas, como que Alcampo habilitara o galego no acceso á rede wi-fi; que a empresa concesionaria da Xunta de Galiza Scolarest galeguizara os menús escolares; que a páxina web da Fundación Catedral de Santiago estea tamén dispoñíbel en galego; que o Concello de Vivero inclúa nas notificacións do servizo da ORA; que IKEA incorporase o galego á súa páxina web; ou que o Concello de Ribeira deixe de usar o topónimo deturpado Ribeira con V e pase a usar a forma oficial e legal, Ribeira. “Se se actúa, as cousas poden evolucionar”, apuntou Marcos Maceira, quen tamén recordou que A Mesa trasladou información sobre estas vulneracións a diversas entidades internacionais, como a ONU ou o Consello de Europa, e que así o seguirá facendo.

Neste sentido, Maceira recordou que informes como o da Liña son fundamentais para documentarmos casos de discriminación lingüísitica, para coñecer os máis habituais, quen está implicado e se corresponde a unha política determinada contra as linguas por parte da institución ou empresa. E a deputada de Lingua da Deputación da Coruña, María Muíño, destacou a súa vontade de reforzar o compromiso e apoio á Liña do Galego, “un proxecto que recolle información de xeito sistemático e obxectivo, o que resulta moi útil para as administracións públicas que queren avanzar no noso compromiso coa Normalización Lingüística, como é o caso da Deputación da Coruña”.

INFORMES INTERNACIONAIS

O presidente da Mesa recordou que tanto o Consello de Europa como a ONU -a través do informe definitivo sobre a situación das minorías no Estado español elaborado polo relator especial da Oficina do Alto Comisionado para os Dereitos Humanos, Fernand de Varennes e que foi publicado esta mesma semana (ligazón)- recollen expresamente a vulneración dos dereitos lingüísticos en Galiza, baseándose nos “coherentes” informes que lle presentou a Mesa pola Normalización Lingüística como proba de que “as e os galego falantes non poden empregar a súa propia lingua coas autoridades públicas en Galiza, malia o aparente dereito a facelo”.

“A Xunta debe modificar urxentemente a política lingüísitica para garantir a presenza e a plena dispoñibilidade do galego en todo e para todo”, recordou Maceira, “nomeadamente na administración e no ensino e mesmo reclamar ao Estado que cumpra a súa parte”. En once anos, o goberno autonómico recibiu tres posicionamentos contrarios do Consello de Europa e agora engádese o da ONU. “Non chega co recoñecemento formal do galego”, salientou, “senón que debe ter consecuencias”.
Neste sentido, o responsábel da Mesa explicou que “Xunta e Estado teñen até o día 1 de agosto para enviar ao Consello de Europa as liñas que desenvolverán para cumprir coas recomendacións” e teñen de prazo até 2023 para cumprilas. “Antes do 1 de agosto, deben anunciar a derrogación do decreto e como será o novo”, afirmou. E asegurou que “se hai posicionamento internacional a respecto dos nosos dereitos lingüísticos é porque a sociedade galega está na rúa e conta con entidades como a Mesa, que só recibe impedimentos por parte da Xunta e mesmo boicot ás súas accións no ámbito internacional, como reflicten os informes do Estado tanto ao Consello de Europa como á ONU”. “Se se nos escoita fóra”, concluiu, “é só porque actuamos en Galiza. Por iso animamos a continuar. O novo goberno debe cumprir coa súa responsabilidade. A actitude respecto ao galego en todos os ámbitos é contraria aos interese do pobo galego. Dicímolo en Galiza centos de entidades e fóra os principais organismos internacionais de dereitos humanos, democracia e desenvolvemento social”.
Doazóns

Realiza unha achega económica puntual para axudar no funcionamento da asociación. Colabora aquí

Ler máis
Nais e Pais polo Ensino en Galego

Colectivo constituído por un grupo de persoas preocupadas pola inexistencia de oferta educativa en galego e polo escaso valor social que segue a ter a nosa lingua. Saber máis

Ler máis
Observatorio de Dereitos Lingüísticos

Membros da xudicatura, da avogacía, sociolingüístas, docentes universitarios e profesionais do Dereito, sensibilizados co a lingua galega. Saber máis

Ler máis
Fundación Vía Galego

Fomentar o intercambio cultural cos outros territorios pertencentes ao sistema linguístico galego-portugués. Saber máis

Ler máis