A Consellaría de Educación só emprega o castelán nun curso de formación
Chegou á Mesa pola Normalización Lingüística unha nova queixa sobre o uso do idioma, esta vez, nun curso en Platega (Plataforma de Teleformación Galega) ofertado pola Consellaría de Educación da Xunta.
Unha profesora matriculouse no curso “A creatividade desde a intelixencia emocional” pero atopouse con que o material está totalmente en castelán. A pesar da súa mensaxe preguntando se todos os bloques do curso ían ser en castelán, contestáronlle que non o sabían mais que ela podería facer os exercicios en galego.
Desde o Centro Autonómico de Formación e Innovación contestáronlle á queixa pedíndolle desculpas polas molestias e argumentando que non foi posíbel a tradución do actual curso nesta edición e que a gran demanda fixo que se ofertase igualmente sen ter en conta a discriminación lingüística que iso supón.
A propia Xunta de Galiza incumpre a Lei de normalización lingüística de 1983, artigo 4, no que se acredita que “o galego, como lingua propia de Galiza, é lingua oficial das institucións da Comunidade Autónoma, da Administración local e das entidades públicas dependentes da Comunidade Autónoma”. Ao mesmo tempo, tamén se incumpre o Decreto 79/2010 para o plurilingüismo que no seu artigo 3 di que “na administración educativa propia de Galiza e nos centros de ensino sostidos con fondos públicos utilizarase, con carácter xeral, a lingua galega e fomentarase o seu uso oral e escrito (…)”.
