Unha “macro foliada” na que participaron máis de 45.000 persoas defendeu esta mañá en Compostela a vitalidade da lingua galega. “As cantareiras, a quen homenaxeamos este 17 de maio, recolleron a nosa historia, a nosa tradición, a nosa idiosincrasia, nun repertorio que nos legaron a través dun percorrido de séculos e fixérono na lingua que o orixinou”, salientou a coordinadora de Queremos Galego, Celia Armas, dende o palco da praza do Obradoiro, “a nosa lingua”.
O voceiro de Queremos Galego, Marcos Maceira, afirmou ante unha praza do Obradoiro repleta que “este 17 de maio é histórico e é decisivo”. “Os nosos netos e as nosas netas poderán dicir con orgullo que viven en galego porque os seus pais e nais, avós e avoas defenderon o idioma que é seu e fixeron todo o posíbel e o imposíbel para restituílo e derrotar os programas de destrución”, destacou.
“Tentaron desactivarnos en novembro fronte ao multitudinario plenario de Queremos Galego, en febreiro perante a manifestación masiva nestas rúas”, asegurou Maceira, “mais non conseguiron desmobilizar a sociedade galega”. “Aquí está a forza do pobo galego”, exclamou, “hoxe, máis que nunca, disposto a impulsar e concretar a alternativa dun novo rumbo para o galego: o proceso Lingua Vital aberto, participativo e plural”.
Neste sentido, o voceiro de Queremos Galego defende que a mobilización e a toma da iniciativa pola lingua pola sociedade galega é o único que pode facer mudar o rumbo do idioma e reverter a emerxencia lingüística. “Se a Xunta renega de Galiza e non quere asumir a súa responsabilidade farémolo nós”, sentenciou. “Agardamos que o PP se sume, que cumpra o seu deber e abandone a belixerancia contra Galiza e o galego”, recoñece Maceira, “mais non imos ficar á espera de que os xefes de Rueda e Feixó en Madrid decidan emendar o seu programa, cada día menos oculto, de eliminación do galego”.
A coordinadora da plataforma en defensa da lingua, Celia Armas, recordou que nesta multitudinaria manifestación conflúe o traballo dos máis de 20 plenarios celebrados noutras tantas comarcas galegas e leu os nomes das ducias de entidades que forman parte do movemento Lingua Vital Xa. Armas afirmou que “se a Xunta quixese”, se poderían implementar “medidas conducentes a ir favorecendo a recuperación de falantes”. E concluiu: “así que aquí nos teñen, orgullosos da nosa lingua milenaria, berrándolles que queremos ter os mesmos dereitos que calquera outro falante de calquera outra lingua.”
